移居英國，最多人問我的一條問題：英國生活係咪好悶？
其實真係好難答，可能我係香港生活時都係一個悶人，以前返工時間長，一星期5日至少OT 3日，每日交通來回唔見3粒鐘。基本上每日生活就係起身、搭車、返工、OT、放工、撘車、攤位係梳化Hea、瞓覺。住係屯門連周末都少出街，最叻留係屋企攤屍，這樣的生活，試問有幾多姿多彩？
係，有時會約下朋友、會去飲酒唱K，會行商場。但千篇一律的娛樂，久而久之就唔再特別。
英國悶嗎？視乎你點諗，平日屋企工作係好少出街 (以前困係Office咪一樣)。星期六日反而會晨跑、郊遊、野餐、行市集、探朋友、到第二個城市逛。英國人好重視周末，基本上有很多周末活動可以參與，唔肯搵活動大叫悶，我會話抵你悶死。
的確住係北部可能係冇南下倫效咁好多玩，當Oreo同我講Newcaslt係Party City，我第一次聽到心諗你咪玩啦。但當你星期五、六晚出街，就會見到大量鬼妹重裝上陣，低胸背心短裙攞你命高踭鞋，以及一大埋醉酒喧嘩學生，就知道英國人很會找樂趣。
如果我喜歡Party，英國生活一點都不悶。
講到尾，人地覺得外國生活悶，係想像到原本的生活模式被打破，就會產生「咁有乜好做」的慌張感。只要慢慢建立日常就好了。
這一刻問我英國悶唔悶，我會答我懷念的是香港的熟悉感，不是多姿多彩的生活。
Search